དཔལ་ལྡན་འབའ་རོམ་བཀའ་བརྒྱད་དང་དེའི་སྲོལ་འབྱེད་པ་པོ་དར་མ་དབང་ཕྱུག་མཆོག་གི་རྣམ་པར་ཐར་པ་བཞུགས་སོ།།

བཀའ་བརྒྱུད་གྲུབ་མཐའི་ཡ་གྱལ་དྭགས་པོ་བཀའ་བརྒྱུད་ཀྱི་ནང་གསེས་ཤིག་སྟེ། འབའ་རོམ་པ་དར་མ་དབང་ཕྱུག་ནས་བརྒྱུད་པའི་བཀའ་བརྒྱུད་པའི་གྲུབ་མཐའ་ཞིག་ལ་འབའ་རོམ་བཀའ་བརྒྱུད་ཅེས་གྲགས།  འབའ་རོམ་བཀའ་བརྒྱུད་ཀྱི་སྲོལ་གཏོད་པ་པོ། རྗེ་འདི་ཉིད་ཡབ་གནས་བརྟན་སྟོན་པ་དང་ཡུམ་ཇོ་མོ་ལོ་ཆུང་མ་གཉིས་ལ་སྲས་གསུམ་ཡོད་པའི་འབྲིང་བ་རུ་རབ་བྱུང་གཉིས་པའི་མེ་ལུག་ཕྱི་ལོ་ ༡༡༢༧ ལོར་འཕན་ཡུལ་གྱི་ཀ་བ་ཡུལ་སྣ་ཞེས་པར་སྐུ་འཁྲུངས། མཚན་འབུམ་སྐྱབས་གསོལ། དགུང་ལོ་བརྒྱད་ལ་ཕེབས་སྐབས་མཁན་པོ་ཀ་བ་དར་མ་སེང་གེ་དང་། སློབ་དཔོན་དབང་ཕྱུག་གཞོན་ནུ་གཉིས་ལས་རབ་ཏུ་བྱུང་། མཚན་དར་མ་དབང་ཕྱུག་གསོལ། དགེ་བཤེས་བྱ་ཡུལ་བ་དང་པོ་ཏོ་བའི་བུ་ཆེན་གྲུམ་འབྲི་ལུང་པ་ལས་བཀའ་གདམས་ཀྱི་ཆོས་སྐོར་རྣམས་གསན། དགུང་ལོ་ཉི་ཤུ་རྩ་གཅིག་ལ་ཕེབས་སྐབས་སྒམ་པོར་བྱོན་ཞིང་དེ་ནས་བཟུང་རྗེ་སྒམ་པོ་པ་དང་བླ་སློབ་ཏུ་གྱུར་ཏེ་བཀའ་བརྒྱུད་ཀྱི་ཆོས་རྣམས་བུམ་པ་གང་བྱོའི་ཚུལ་དུ་གནང་། དཀའ་ཚེགས་མེད་པར་རྟོགས་པ་གཅིག་ཅར་དུ་འཁྲུངས། རྒྱུན་དུ་ཆོས་རྗེ་རིན་པོ་ཆེའི་ཆིབས་ཁ་བ་མཛད། རིན་པོ་ཆེ་ཆིབས་པས་བསྐྱོད་པར་ས་ལ་མ་ལྷུང་བར་བརྩན་གྱིས་བར་སྣང་ནས་བླངས་པར་མཛད་པ་སོགས་སྐུ་སྲོག་གི་བར་ཆད་ཆེན་པོ་བཞི་བསལ། རྗེ་དྭགས་པོ་རིན་པོ་ཆེས་བུ་ཁྱོད་རྒྱ་གར་གྱི་གྲུབ་ཐོབ་བརྒྱད་ཅུའི་ནང་གི་བརྟུལ་ཞུགས་སྤྱོད་པ་ནག་པོ་ཆེན་པོར་གྲགས་པ་དེ་ཡིན་གསུངས། རྗེ་རིན་པོ་ཆེས་ཞལ་ནས། ཚོགས་པ་བདུན་བརྒྱའི་ནང་ནས། གནས་བརྟན་ཡུལ་སྣ་བ་དར་མ་དབང་ཕྱུག་དང་། མགར་སྒོམ་དཀར་པོ་གཉིས་ལས་ཉམས་རྟོགས་ཆེ་བ་སུ་ཡང་མེད་གསུངས། ང་རང་གི་དཔེ་ཁུག་ཁྱེར་ལ་ཤོག དཔེ་ཆ་ཡོད་ཚད་ཁྱོད་ལ་སྟེར་དང་བྱང་འབའ་རོམ་ཞེས་བྱ་བ་མར་པའི་སྒྲུབ་གནས་ཏི་སེའི་གངས་རྒྱུད་མ་ཆད་པའི་གནོད་སྦྱིན་གངས་པ་བཟང་པོའི་གནས་དེར་སོང་ལ་སྒྲུབ་པ་གྱིས་དང་གདུལ་བྱ་ཡོད་གསུངས། དགུང་ལོ་ཉེར་བརྒྱད་ལོར་བྱང་འབའ་རོམ་དུ་ཕེབས་ནས་ལོ་བདུན་གྱི་བར་དུ་སྒྲུབ་པ་མཛད་ཅིང་ཕལ་ཆེར་ཏིང་ངེ་འཛིན་གྱིས་དངོས་སུ་འཚོ་བ་བྱུང་། དེ་སྐབས་བཀའ་བརྒྱུད་ཀྱི་མགུར་ཆེན་ཉི་ཤུ་རྩ་དགུའི་སྐོར་རྣམས་གསུངས། དེ་ནས་ཁམས་སུ་བྱོན། སྐྱོ་དུ་སྐམ་བྲག་ལ་ལོ་གསུམ་བཞུགས། ཁམས་སུ་དཔོན་ཆེན་ཡེ་ཤེས་གསལ་གྱིས་ཞབས་ཏོག་མཛད། ཀོ་མཛོ་དང་ལོ་སྡེ་དགོན་བཏབ། རབ་བྱུང་གསུམ་པའི་ལྕགས་སྦྲུལ་ཕྱི་ལོ་ ༡༡༦༡ ལོར་ནག་ཆུ་ས་ཆར་རི་བོ་ཆེ་བཏབ། བདེ་སྟོང་ཕྱག་རྒྱ་ཆེན་པོ་དང་གནས་ལུགས་ཕྱག་རྒྱ་ཆེན་པོ་མདོ་སྔགས་ཟུང་འབྲེལ་གྱིས་ཉམས་བཞེས་མཛད་པས་སློབ་མ་མང་དུ་འདུས་པ་དང་། དེ་ནས་འབའ་རོམ་བཀའ་བརྒྱུད་ཅེས་པའི་གྲུབ་མཐའ་དར། རིན་པོ་ཆེ་སྟག་ལུང་བ་དང་འབྲི་གུང་ཆོས་རྗེ་སོགས་ལ་ཆོས་འབྲེལ་མང་དུ་ཞུས། མཐར་དགུང་ལོ་བདུན་བཅུ་རྩ་གསུམ་པ་རབ་བྱུང་གསུམ་པའི་ས་ལུག་ཕྱི་ལོ་ ༡༡༩༩ ལོའི་བོད་ཟླ་ ༢ པའི་ཚེས་ ༢ ཀྱི་ནམ་ཕྱེད་ལ་ངོ་མཚར་བའི་ལྟས་དུ་མ་དང་བཅས་ཏེ་ཞི་བར་གཤེགས་སོ། །གདན་ས་ནི་ཁོང་གི་གདུང་རྒྱུད་རྣམས་ཀྱིས་རིམ་པར་བསྐྱངས། སློབ་མ་དུ་མ་བྱོན་པའི་ནང་ནས། བུ་ཆེན་བཞི། ཉེ་བའི་སྲས་བཞི། ཐུགས་སྲས་བཞི། བརྒྱུད་འཛིན་གྱི་སྲས་གཉིས་སོགས་པ་བགྲང་གི་མི་ལང་བ་མང་དུ་བྱོན། མཛད་ཆོས་ནི། བདེ་མཆོག་དང་ཕག་མོའི་སྒྲུབ་སྐོར། ཆོས་དྲུག་གི་ཁྲིད་རྒྱས་པ། གནད་ཆོས་བཅུ་གསུམ། བསྟོད་ཚོགས་ཞལ་གདམས་སྐོར་དང་རྡོ་རྗེའི་མགུར་སོགས་མང་དུ་མཛད།

(Visited 100 times, 1 visits today)